Dowladda Federaalka oo sheegtay iney burburisay keydkii hubka Al-shabaab

Warar dheeraad ah ayaa ka soo baxaya duqeymo xooggan oo ka dhacay gudaha magaalada Aadan Yabaal ee gobolka Shabeellada Dhexe.

Duqeymaha ayaa si gaar ah uga dhacay Xaafadda Howlwadaag ee magaalada Aadan Yabaal ee gobolka Shabeellada Dhexe, iyada oo uu ka dhashay khasaare isugu jira dhimasho iyo dhaawac.

War qoraal ah oo ka soo baxay Dowladda Soomaaliya ayaa lagu sheegay in duqeymaha lala beegsaday xarruumo ay ku sugnaayeen AS oo ku yaalla gudaha magaalada Aadan Yabaal.

Sidoo kale, Dowladda ayaa sheegtay in xarruumaha la burburiyay ay AS u adeegsan jireen diyaarinta gaadiidka dagaalka iyo kaydka hubka.

“Mid ka mid ah xarumaha la beegsaday ayaa lagu soo waramayaa inay ku jireen gaadiid lagu diyaariyay waxyaabaha qarxa, waxaana la arkayay xaruntaasi oo si daran u gubanaysa markii lagu burburiyay howlgal bartilmaameed ah” ayaa lagu yiri qoraalka.

Dhowaan ayay aheyd markii Dowladda sheegtay in duqeyn kale lala beegsaday xarruun ay ku sugnaayeen AS oo ku taalla gudaha magaalada Aadan Yabaal.