Sanbaloolshe oo markale ka mid noqday Baarlamaanka Soomaaliya

Agaasimahii hore ee hay’adda Nabadsugida iyo Sirdoonka Qaranka Soomaaliyeed Cabdullaahi Maxamed Cali Sanbaloolshe ayaa maanta mar kale si rasmi ah uga mid noqday Xildhibaanada Golaha Shacabka ee Baarlamaanka Federaalka Soomaaliya.

Xildhibaan Cabdullaahi Maxamed Cali Sanbaloolshe ayaa ku guuleystay doorasho goordhaw ka dhacday magaalada Jowhar, kadib markii uu tartan natiijadiisa lasii ogaa inuu kusoo bixi doono uu la galay Musharax lagu magacaabo Ismaaciil Warsame.

 

Doorashada maanta ka dhacday Jowhar waxaa codeeyay 101 ergo ah, waxaana 98 ka mid ah ergadaasi u codeeyeen inuu kursigiisa Xildhibaanimo dib u helo Sanbaloolshe, mana jirin wax cod ah uu helay musharaxii kale.

Natiijada doorashada waxaa si rasmi ah ugu dhawaaqay wakiilka Guddiga Madaxa-Bannaan ee Doorashooyinka Qaranka, Cabdi Caddow Maxamed, kaas oo sidoo kale musharraxa guuleystay si rasmi ah ugu guddoonsiiyay shahaadada Xildhibaanimo.

Sanbaloolshe ayaa dhawaan wareejiyay Xilka Agaasimaha Hay’adda Nabad Sugida iyo Sirdoonka ee NISA, waxaana maar kale uu kamid noqon doona Baarlamaanka 11-aad ee dalka.