Ruux isku ekeysiiyay Booliska dalka Kenya oo dambi lagu xelay lana xeray
Maxkamad ku taal Gobolka Naivasha ayaa ku soo eedaysay Nin hore darawal uga ahaan jiray bass inuu iska dhigay sarkaal boolis iyo iyadoo sidoo kale lagu helay dambiyo kale oo dhowr ah.
Joshua Karanjahi Wayganjo, waxa lagu soo oogay labo dambi oo ah bilays isku ekeeysiin, haysasho sharci-darro ah ee darayska bilayska iyo dhac, kuwaa oo dhammaantood uu beeniyay.
Waiganjo ayaa adeegsaday gaadiidka bilayska isla markaana raacay helikabtarka booliska leeyihiin, waxa uu ka qayb-galay kulamo booliska leeyihiin kuwaasi oo looga hadlayay arimaha amaanka.
Sidoo kale waxaa la sheegay inuu shaqada ka eryay askar kale oo heer hoose ahaa ,kuwaasi oo la sheegay inay ka tirsanaayeen ciidamada booliska sidaasina waxaa qoray wargeyska The Standard.
Isagoo la hadlay Capital FM afhayeenka booliska Kenya Eric Kiraithe,ayuu sheegay in arimaha qaar ee warbaahinta ay yihiin kuwo ay ka badbadiyeen laakiina qaarkood ay jiraan.
“Waa wax aad khalad u ah in la yiraahdo waxa uu qaadan jiray mushaar, waxa uu lahaa xafiis ama waxa uu isticmaali jiray gaadiidka bilayska,” ayuu yiri Kiraithe. “Arrinka ayaa waxa lagu hayaa baaritaan eedaysanahana waxa mar horeba la geeyay maxkamad.”
Dacwadda Waiganjo ayaa loo ballansan yahay in la dhageysto Arbacada ‘9-ka January’.
