10 ka mid ah dhalinta Kismaayo oo la qabtay kadib markii ay ka dhego adeegeen amar lasoo rogay
Habeenimadii xalay magaalada Kismaayo ee gobolka Jubbada Hoose maamulka kumeel gaarka ah ee magaalada ayaa soo rogay amaro ah in bandow tahay magaalada Kismaayo,waxii ka dambeeyay salaada Ceshe.
Ciidamada ayaa lagu amray inay qabqabtaan ruux walbaa oo ka hor yimaada amarka lasoo saaray ee ah in bandow tahay magaalada Kismaayo ee gobolka Jubbada Hoose.
Ciidamada ayaa waxay qabqabteen dhalinyaro badan oo la sheegay inay qaadan waayeen amarka kasoo yeeray masuuliyiinta maamulka magaalada Kismaayo ee gobolka Jubbada hoose.
Dhalinyarada la qabtay ayaa waxay gaarayaan 10 ruux,kuwaasi oo la sheegay in la dhigay saldhiga magaalada Kismaayo,halkaasina waxaa la sheegay in baaritaano lagu sameynayo.
Habeenimadii xalay magaalada Kismaayo ee gobolka Jubbada Hoose ayaa bandow aheyd ,iyadoo aan la ogeyn ujeedada ka dambeysay bandowgaasi.
