Seddex ka mid ah Alqaacida oo lagu dilay duqeyn loo geystay goob ay ku sugnayen
Ku dhawaad seddex ruux oo looga shakiyay inay ka tirsan yihiin Alqaacida ayaa lagu dilay dalka Yemen ,kadib markii diyaaradaha drone-ka dalka Maraykanka ay duqeeyeen koofur galbeed dalka Yemen.
Saraakiil ka tirsan gobolka ayaa sheegay in duqeynta ay ka dhacay gobolka Albayda ee koofur galbeed dalka Yemen halkaasi oo ay ku dhinteen seddex ruux oo ka tirsan Alqaacidada dalkaasi.
Saraakiisha dalka Yemen ayaa sheegay in mid ka mid ah seddex ruux ee dhimatay uu ahaa sarkaal sare oo ka tirsanaa Alqaacida laguna magacaabo Saleh Mohammed al-Ameri.
Maraykanka kama uusan hadlin weerarkaan ka dhacay koofur galbeed dalka Yemen,laakiin duqeyntaan ayaa waxay noqoneysaa markii afaraad oo duqeyn dhanka cirka ah muddo todobaad ah ay ka dhacaan dalkaasi.
Maalintii jimcaha ,labo ruux oo looga shakisan yahay inay ka tirsan yihiin mucaraadka dalkaasi Yemen ayaa lagu dilay beriga Xadramout ,halka ugu yaraan shan kale ay ku dhinteen labo duqeyn oo 24 December ka dhacday dalkaasi.
Wakaalada wararka dalkaasi Yemen ee SANA ayaa sheegtay in dadka dhintay ee seddexda gaareysa ay yihiin kuwo ka tirsanaa Alqaacid.
Wadanka Yemen waxaa iminka lagu tiriyaa wadanka ay sida aad ah ugu badan yihiin Ururka Alqaacida,iyadoo diyaaradaha dagaalka Maraykanka ay duqeymo ka geysanayaan dalkaasi.
