Dowlada Filipiin iyo QM oo dalbaday in gargaar lagu caawiyo dadkii ku waxyeeloobay duufaantii dalkaasi.
Dowlada Dalka Philippine iyo Qaramada Midoobay ayaa waxay dalbadeen wax ka qabashada dadkii ku waxyeeloobay duufaantii Bopha ee dhawaan ku dhifatay Koofurta Dalka Philippine iyo kumaanka dad ee wali lagu la yahay dhulka ku yaala xeebaha dalkaasi ee Koofurta ee Philippine.
Tirada dadka ku dhintay duufaantaasi ayaa gaartay 650 waxaana sidaasi sheegay madaxa arimaha masiibooyinka dalkaasi,isagoo xusay malaayiin reer Philippine ah ay haysato guryo la’aan.
Sidoo kale masuulkaan ayaa sheegay in dadkaasi aysan heysay waxyaabaha aasaasiga u ah nolasha oo ay ka mid yihiin raashiinka iyo biyo nadiif ah.
Benito Ramos ,ayaa isaga oo ku sugan magaalada Manila ee dalkaasi Philippine sheegay in 647 ruux meydkooda la helay ,halka 900 oo ruux walli la yahay,waxaana la la waayay ku jiro kaluumaysato ku sugnaa xeebaha Mindanao.
Qoysaska kaluumaysatada iyo warshadihii ay la shaqeynayeen ayaa sheegay inay waayeen meel ay kala xiriiraan ku dhawaad 300 kaluumaysato ah kuwaasi oo ku sugnaa xeebaha koofurta Philipine.
Ramos ayaa ugu baaqay hayadaha caalamiga ah iyo dowladaha kale inay ka gacan siiyaan samata bixinta dadka ku maqan xeebaha koofureed ee dalkaasi Philipine.
“Hadda waxaan helnay kaalmo yar oo ay sameeyeen ururo kooban oo ka dhisan dowlada iyo gargaarka dowlada,laakiin deeqaheena walli ma ahan kuwo kaafin kara waqti xaadir” ayuu yiri Madaxa guud ee masiibooyinka dalkaasi.
Sidoo kale Ramos ayaa sheegay in kooxaha kaluumaysatada ah kasoo dhaqaaqeen xeebaha dhanka koofureed ayna kusoo dhawaayeen gobolka Sarangani ka hor inta aysan duufaanta Bopha ku dhifan xeebaha Mindanao Talaadadii lasoo dhaafay.
Ugu dambeyn waxa uu ugu baaqay madaxda dalalka deriska la ah Philipine inay wax u qabtaan dadka ku dhaqan gobolada Koofureed ee dalkaasi oo dhawaan duufaano xoogan ay ka dhaceen.
